من خاف سلم ؟ ولا ماسلمش ؟

هو صحيح من خاف سلم ؟؟ طيب ما ممكن خوفة يوقفة في مكانة مايخلهوش يحقق حاجة في حياتة .. و ممكن خوفة يربطة ما يخليهوش يجازف .. مايخليهوش يدوق حلاوة المغامرة .. مايخليهوش يدوق حلاوة نجاحات و احاسيس و حاجات كتير اوي كان ممكن يعملها و يحسها و يلاقيها بس لو ماخفش :)) من خاف يمكن سلم في حاجات .. بس اكيد اللي بيخاف بيخسر كتييير :)) يا ترري في كل مرة خفت .. سلمت ولا ضيعت عليا حاجات كتيير كنت نفسي فيها

شجاعة

سعات الانسان بيفقد شجاعتة .. مع انه واثق من نفسة و عارف كويس اوي ان قيمتة في نفسة مش اي حاجة تانية.. بس يمكن لان الخوف دة طبيعة بشرية :) علشان احنا بشر بقينا عندنا حتة خوف كدة .. بجد مش عارفة !! بس اللي عارفاة ان حتي الاحساس دة بيبقي حلو:)) و حاسة ان ربنا ادانا ان احنا نعيش الاحاسيس دي كلها و نتمتع بيها :) بس الفكرة كلها في انا ازاي حبص لمشاعري حتي لو كنت حزينة

ابي..هو ملكي

أبي ... روحك ترفرف حولي ... مع كل دقة في قلبي تخرج مهللة بسعادة قلبي أشعر و كان روحك تضمني لتعلن وجودك معي .. فقط أتمني لو كنت معي الآن ... لتضمني !! ليتك كنت بيننا الآن لكي تعلن رضاك و فخرك بي ! ليتك كنت بيننا لاري في عيونك فرحة تضاعف فرحتي ! ليتك كنت بيننا لاحتضنك و أنسي كل ما أوجعني يوم :) و لكنك ستظل ملك حياتي كنت هنا أو في مكان أحسن :) ستظل أبي ... ستظل كل شيء !

النجاح يختلف

احلي حاجة بقي يا بشر في اللي الواحد فيه دة :)) ان ناس صحابك شايفينك مبسوطه و المفروض محققه حاجة كويسة و ولا يعبروكي اصلا :))) و الغريب ان ممكن حيجمعكوا موقف و حيضحكوا في وشك عادي :)) دة نسمية ايه بقي يا جدعان نفسنة مثلا !!
و ناس اصحابك بس عادي و فرحولك بجد و كنت حاسة الفرحة من قلبهم بجد مش هزار :)) و بجد فرحوني اوي اوي :)) دة ممكن نسميه حب بجد مش بيمنعه الدنيا اللي بتاخدنا لكن لما بتحصل اجة بيبقوا جنبي و بيفرحولي :))
في الاوقلت دي بقي بيقولوا دايما حاجة ماكنت بعرف معناها ... بس دلوقتي علرفت معناعا ؟؟ كانوا بيقولوا " المعادن بتبان " الحمد الله فهمت

لمؤخذة ...مين اللي قال ؟؟

حدخل  في  الموضوع  علي  طول  منغير لف و  دوران  .. مواقف  في حياتنا  تستاهل  التمرد !!ورغم  ان  احنا اللي بنوافق عليها غصب عننا  ..إلا  ان ضعفنا  في  التمرد  عليها  ما  بيأذيش  حد  بيها  اكتر مننا احنا  بردة ... حكمنا علينا نكون  الجاني و  المجني  علينا  بسكوتنا   !!
حاجات اتحكم علينا   ان  احنا نورثها و  نصدقها و ننفذها و  سعات  بيتحكم  علينا  ان احنا نقنع نفسنا بيها غصب  عننا .. علشان بس في شبح كدة اسمه "عادات و  تقاليد " او  اسمه "عرف " او مالوش  اسم خالص  بس  بيبقي  الرد عليه  :
 " هما  قالولنا كدة  زمان "  
 "الناس  اصلها  بتفكر كدة "
  "اصلنا اتعودنا علي كدة "
 " المجتمع  فرض علينا كدة"
كل  الجمل  دي  اللي  بيتحط  تحتيها  كتييير من الكلام  او الاحكام  اللي مش  حبقي  ببالغ  لو  قلت  انها ممكن  بجد تدمر  حياه  بني أدم و تسرق منه  حلمة و حياته و أقلها  حتخنقه و تكتفه
الكلام  دة  من واقع حياتنا مش من برة  للاسف  ...بس مين  اللي قال و مين  اللي قرر  لمؤخذه  بس  حد  يقولي...علشان مزنوقة  في  اجابة !!
مين  اللي  قال ..ان  اولاد  الشوارع  كلهم  فاشلين ..يمكن  عندهم  حلم ما حدش  بس  سألهم علية ...ولا بأمارة ايه .. لازم  يبقوا منبوزين  من  الناس و  نقرف  حتي  نكلمهم ...برغم ان  اللي  عملهم  أولاد شوارع  هي  قسوة  مجتمع  احنا جزء منه  !!
مين  اللي  قال ..ان  الزبال ...أحم  قصدي  رجل  النظافة ..مش  نضيف و  يتقرف منه ؟؟ مع  انه  في  الاصل  بينضف  الزبالة  .. قصدي  القمامة  اللي احنا  بنرميها  !!
مين  اللي قال.. ان  اللي يتولد  مايعرفش  اب  ولا ام  يتحكم  علية  يموت و  هو  حي و  يشيل  وصمة  عار  طول  حياتة  لمجرد  انه  كان نتيجة غلطة مالوش  ذنب فيها !!
مين اللي  قال.. ان  البنت اللي  تغتصب  ..مالهاش حق  تعيش  ..و  يحق  دفنها  او  تموت  بدل  العار ما  يحل  علي عليتها مع ان هي المجني  عليها مش  الجاني !! العار  الحقيقي  ان  الناس  يسيبوا  الجاني  يرمح  بحريتة  و  يمسكوا  في  الفرخة  المدبوحة  !!
مين  اللي  قال.. ان  البنت  تسكت  لما  حد  يتحرش  بيها علشان  بس  الفضيحة  .. مع  ان  الفضيحة اللي بجد هو  السلوك  اللي  لا  يرضي  بيه  دين ولا  تربية ولا  يرضي اي  حد  ان  يلاقي  شواية  صفات  حيوانية  بتاخد  مكانها  بال"اوي " في  البشر !!
بأمارة ايه الارملة و المطلقة لازم يحكموا  علي نفسهم بالعزلة لو حبوا يربوا عيالهم علشان المجتمع بقي بجح و بيتهمهم بأي تهمة تسبهم لمجرد انها منغير راجل و كأنها مستنياه علشان يحكمها .. و كأن مافيش في  حياتها حاجات كتير بتوجها ذي المبادئ و الاخلاق و الدين .. و الكارثة الاعظم ان البشر دول بقوا فاكرين نفسهم ربنا ... ليهم  حق  يحكموا عليها و يعاقبوها علي الارض .. ما كل واحد يخليه في حالة بقي !!
مين  اللي  قال..  ان  البنت  ولا  الست  لما  ترجع  متأخر  يبقي  لازم  يتشك  فيها و  الناس  تتكلم  عليها  ..ايش  ضمنك  تكون  راجعة  شقيانة  من  شغلها  ؟ ولا  راجعة  من  درس  ؟ ولا  كانت بتحل  مصيبة لو  اتحطيط فيها  ماتستحملش !!
مين اللي  قال..  ان  البنت  عار..و ان  حقوقها  اخر  حاجة  تتبص  عليها  .. رغم  تدين  هذا  المجتمع  المظهري  ..  ان جوهر الاديان  ماحدش  عارف يمثلة بجد ...
مين اللي  قال.. البنت  ما  تعملش  حاجات  كتير  اوي  نفسها  فيها  "ابسطها  تركب  عجلة  في  الشارع  و  ماحدش  يدايقها " علشان  المجتمع  مابقاش  بيقبل  بكدة    .. و  الولد  لما  يعمل  اي  حاجة  حتي  لو كانت  غلط   بيقولوله  قشطة  فل  عليك  يا  معلم  استمر :):) مش عارفة علي اساس ايه  ؟!!
مين اللي قال ..ان البنت  و  الولد  يبقوا مش عاجبين أهاليهم  لانهم نسيوا ان  الاجيال  اتغيرت  و  فاكرين  نفسهم لسة  سنه   70 و  يجبروا ولادهم  "يحوروا عليهم " او  بمعناها  الحقيقي  يخدعوهم  و  يكدبوا  عليهم و  محدش  خلي الاولاد  يعملوا  كدة  غير  سلوك الاهالي  نفسة !!
طبعا ما بلغيش  ان  في اولاد و  بنات  بيغلطوا !!
مين  اللي  قال ..ان  البنت  و  الولد لما  يبقوا  مع  بعض  في  اي حتة  يتشك  فيهم ؟؟هي  ايه   الصداقة  بخ ؟؟
مين  اللي  قال ..ان  الولد اللي مطول  شعرة  يبقي وحش و  مش  راجل و  معندوش شخصية  بيقلد الغرب  و  عايز  يلفت  النظر .. هو  ممكن  يكون  عندة  دماغ  توزن  بلد و  احسن  مني  و  منك  100 مرة  ..هو  بس  عجبة  شكلة  كدة  ..هو حر .. من حقة يكون زي ما اختار انه يكون !! و من حقة بردة نحترمة!
مين  اللي  قال ..ان اللي  مايلبسش   "ماركات  عالمية " يبقي  بيئة  و  مش  ستايل  و  زي  مابقينا  نقول  عليه  دلوقتي  ... مش نضيف !!!
مين  اللي  قال..  ان  الشباب  اللي  قاعد  علي  القهاوي ...شباب  فاسد و  ضايع ؟؟هو  مين  اللي كان عمل الثورة و  مين  اللي كان  عايز  يغير  الظلم و  الفساد ؟؟ هم  بس مالقوش  حاجة  يعملوها في بلدهم  تانية  لو  كانوا  لقوا  ماكنوش  قالوا لا!!
مين اللي  قال..   ان  العريس  لازم  يبقي  معاه  عربية  و  شقة  و  حساب  في  البنك  و  يبقي مستواه  اعلي  علشان  البنت  تطلع  لاعلي  ما  تنزلش  لمستوي  اقل  في  العيشة  ؟ ما  زي  ما  تتشرط  .. حيتشرطوا  علي  ابنك ..مردودالك  ..مردودالك !!
مين اللي  قال.. انك  لما  تتقي  ربنا  في  الولد  اللي  حيتجوز  بنتك  تبقي  بترخصها ... ما  انت  لما  حتجوزها  لواحد  غني  و  اكبر  منها  في  السن  او  مش  بتحبة  ..  حتبقي  بتبعها  بجد  !!
مين اللي  قال.. ان  الغني  لازم  يبقي  فاسد .. و الفقير اكيد  شريف !!بأمارة ايه الناس بتحكم   علي  الشخص  من  شكلة  و وضعة  الاجتماعي  و  مظهرة و  طريقة  كلامة ؟؟
مين اللي قال ان حضرتك مضطر انك تقنعني برأيك .. و اني مضطر اقتنع ..انا و انت اصلا مختلفين و حلاوتنا في اختلافنا و لو كان من حكمة الخلق تشابهنا ماكنش ربنا عجز عن كدا ..ما نتمتع بالاختلاف دة و ندور علي التشابه اللي يجمعنا احسن ما احنا بننبش علي الاختلاف اللي يفرقنا .. و صدقني قبولك  ليا مش حينقصك  حاجة  ..
مين اللي قال .. ان  لما  حد  يقول  الحقيقية  و  يكشف  ستارة  مستخبين  وراها  .. بنتهمة  انه  بيخرج  عن  الاطار العام ... هو  الاطار  دة  مين  عملة  اصلا  ؟؟ و  تقولة " انت ايه  اللي  بتقولة  دة ؟" و " مايصحش  اللي  بيتقال "...هو  ايه  اللي  مايصحش  يا  اخ ؟؟ الحقيقة  مرة  معاكوا  و  صعبة عندك حق   .. بس  لا  يصح  إلا  الصحيح !!
مين اللي قال ان اللي يعمل كل المظاهر اللي تخليه يبان لنا متدين دة يبقي "فُلة..شمعة ..منورة "عند ربنا و يستاهل كل الاحترام .. مع ان ممكن يكون بيداري نقص فيه .. و علي رغم  كمان ان في ناس في حياتنا "أوليا .. و قدسين " بس احنا عنينا اللي بتبص علي المظهر حكمنا عليهم بأنهم  مجرمين لمجرد  ان فقرة و مظهرة حطوة في  خانة "بلطجي "
 كل  الناس  دي  ذنبهم  ايه  غير  انهم  بس  طلعوا  لقوا  نفسهم  في  مجتمع  بيصرخ  ليل  نهار  انه  بيكرة  العنصرية  و  هو  غطسان  في  عنصرية  حقيقية  تدينة  يوميا .. العنصرية  مش  سياسة  بلد  ..  العنصرية  اسلوب  حياه !!

لو  قعدت  احكي  و اعيد و أزيد  في  مواقف  و  احكام  من  الي  فرضها  علينا  المجتمع  مش  حخلص  و  حلاقي  بدل  الحكم  ..الف  حكم  حكمة علينا  المجتمع  لا  له   اساس علمي ولا ديني ولا عقلاني ولا حاجة غير  جهل و عنصرية  مجتمع متعفن  في مظهريتة ...و  فاكرين  ان  احنا كدة  نبقي بنحافظ  علي مجتمعنا  و  تراثنا  اللي بقي  مسخ  و  بيتلاشي  .. يمكن  لولا اغنية  " مع  بعض " كنا نسينا احنا تراثنا شكلة ايه ! بس  الحقيقة  ان احنا بدلنا العادات  و  الثقافة  الشرقية  اللي العالم كلة  كان  بيتحاكي  بيها  بشوية  عادات و اعراف جهلة  مالهاش  علاقة  بالانسانية  ولا بالعقلانية  لمجرد نكون  متشددين  حتي  لو  التشدد  دة  بيقهر  ناس كتير  اوي  و  بيقتل  جواهم  الرغبة  في  الحياه !
اكيد العيب  مش  فينا  ان  احنا  طلعنا  لقينا  في  قيود في  المجتمع و  أراء  غريبة  عقولنا  البشرية  سعات  بترفضها و ماتقتنعش  بيها  بس العيب  االي  بجد  ان  احنا نقول " حنعمل  اية  يعني  ما   كلها  كدة  " و نستسلم  و  نخجل  نثور  علي  اوضاع  المجتمع  اللي احنا  بنحاول  نعيش  فيه  ...من  رأي  لو  ما عرفتش  اثور ممكن  اموت  مجنونة  من  التناقض  المجتمعي اللي  عايشاه  .. اللي  في  شكلة  المتدين  و  بروح  تدينة  المفروض  يبقي  انضج من  حالتة  اللي  هو  عليها  دلوقتي ..
دعوة من  اعماقي الشخصية  للثورة علي اوضاع حياتنا المأسوية  اللي بتقتلنا و حتقتلنا و بتقتل كل  ذرة انسانية جوانا
كل كلمة قلتها مش  بالضرورة  تتفق  معايا  فيها  او  تختلفوا ... المهم  ان  كل موقف  حكموا  فيه  انسانيتكم ...و  عقولكم  .. و دينكم بس بروحة  مش  بمظهرة  !!

ضحة

من فترة كدة كنت سرحانة مرة و شفت صورة مكتوب عليها " نفسي اضحك ضحكة ..بوأي يوصل فيها لأفايا " لما سرحت فيها كنت جوايا حزن حقيقي .. و فكرت كدة هو في حد ممكن يبقي سعيد للدرجة دي !!! كنت فعلا مش شايفة سعادة و كأن الواحد لما بيبقي في حالة بيفترض ان مافيش اصلا حالات تانية ...بس انهرضة عرفت يعني اية الواحد يبقي بيضحك ضحكة من بقه لافاه :)) عرفت ان ممكن تكون مبتسم بس و قلبك بيزرغت من الفرحة

لا يوجد نجاح صعب .. احيانا يأتينا النجاح و نحن لم نكن نتوقعة ..نتمناه كثيرا و احيانا كثيرة ياتينا علي غفلة من الزمن لم نكن في حسبانها ..و تزداد في قلوبنا علي الفرحة بالنجاح .. الفرحة من المفاجأه ذاتها !! و يبقي الاصعب هو الحفاظ علي هذا النجاح

نجاح امرأه

إذا شعرت المرأه بالنجاح لاستطاعت ان تتخلي ان جميع احتياجاتها !! و لو عرفت المرأة ان من حولها ينتظرون فقط سقوطها ليحاولون التقرب اليها لمنعت نفسها من الفشل :) لجعلت نجاحها هو و الموت علي كفين ميزان حياتها ...لعرفت ان إما الموت و إما النجاح و ما لثالث في حياتها مكان

نجاحي

عدم تشجيعك لا يقلل من نجاحي ....و عدم انبهارك لا يقلل من عظمتي في شئ .. قل ما تشاء فأنا لازلت اشعر بقيمتي حتي بعد كل نقدك و رفضك لي :) فنجاحي لا يتعلق بتعليقك المنبهر بروعة أدائي !! شكرا لمن يقدر افعالي و شكرا لمن ينقدني و شكرا مضاعفا لهم لانهم يجعلوني ابتسم شفقة عليهم ... ان الغباء تملكهم اهذة

ما تتجوزيش..نصيحة

ما تتجوزيش علشان  اهلك  ضاغطين  عليكي  و  عايزين  يفرحوا  بيكي...ما  ينفعش  تدفعي  تمن  فرحتهم  تعاسة  تعشيها طول عمرك

ما تتجوزيش علشان متقدملك  عريس  من اللي  بيقولوا  عليهم  "كما  قال الكتاب " و  مافيهوش  غلطة و  تبقي  عبيطة  لو  رفضتيه  .... حتبقي  عبيطة  بجد  لو  وافقتي و  انت مش  مرتاحة من جواكي

ما تتجوزيش لو  سنك  قرب  علي  ال 30 و  بيقلولك  : القطر  خلاص  حيفوتك " " حتعنسي " لا  في  قطر من  اساسة  علشان  يفوتك  ولا  في  كلمة  اسمها  عانس :) ده مجرد  مجتمع  مريض  خلق  حاجات  علشان  ينقلك  مرضة  بيها

ما تتجوزيش لو فشلتي  في  علاقات  كتير  في حياتك و  فكيتي  خطوبتك  مرتين  و  خايفة  تفكي  المرة  دي  كمان  علي  اساس  ان  صعب  بعد كدة  تلاقي  حد  يتجوزك 

ما تتجوزيش عشان  المجتمع  و  طنط  فلانة  و طنط  علانة  كلوّ وشك  من كتر  الكلام  علي  الجواز و  العرسان  علشان مافيش  حاجة  اسمها  " شدي  حيلك  بقي و  اتجوزي " ولا  انت  فيكي  عيب  ولا  مريضة  :)  انت  بس  انسانة  لسة  مالقتيش  اللي  يريحك

ما تتجوزيش علشان  الوقت  بيعدي  بيكي  و  صحابك اغلبهم  الدبلة  احتلت  الايد  اليمين ولا  الشمال و  الكلام  في  البيت ولا  وسط  صحابك  بيخليكي  تحسي  بفشلك :) هم  اتخطبوا  و  اتجوزوا و  مبسوطين .. مش  لازم  انت تتعسي  نفسك  علشان  يبقي  اسمك  مخطوبة  قدام  الناس و  صحابك

ما تتجوزيش واحد  عاجب  اهلك مش  هم  اللي  حيعيشوا معاه ..ولا عاجب  صحابك  كان  اتجوزهم  هم احسن !! هم  مالهمش  غير  انهم  يقولولك  مبروك  لو  افقتي  ..رلأيهم  مش  حيغير  في  اختيارات  لان  الاختيار لازم  يكون  منك  انت  ..علشان  ما  تندميش  بعد كدة  لانها  حياتك مش  حياتهم

ما تتجوزيش او  ما  تقلقيش  ان  نت  عديتي  ال23  و مافيش  في حياتك  اي  شاير  خطوبة ولا جواز  المشكلة مش  عندك  المشكلة  في مجتمع  اللي  بيرعب  البنت  انها  بقت  عندها  23 سنة  و  لسة  مافيش  حاجة !!  ده مش  وصمة  عار  .. هو مجرد  نظام  اجتماعي مش  اكتر :) انت  مافكيش  مشكلة .. المشكلة  فيهم

ما تتجوزيش علشان  حتطلعي  من الكلية  خلاص  و  انت  في مجتمع  بيعزز  فكرة  انك  تتخطبي  في  الكلية  علشان  تخلصي و تتجوزي  و يكروتوكي كدة  بحجة  ان  اللي  بتطلع  من  الجامعة  مش  متجوزة  بيبقي  فرصتها  قليلة !!  لا  خالص  اضحكي  علي الناس اللي  تقولك  كدة  .. و  قرري  انك  تعيشي  حياتك  بكل  فتراتها  و  تستمتعي  بيها  بجد !

ما تتجوزيش واحد  ماتعرفيهوش  .. لان الطبع  بيغلب  التطبع  :) و مش  الطبيعي  ان  في  مجتمع تعفن  من  المظهرية  انه  يكون  من  اول  لحظة  علي  طبيعتة  ... خلي  المواقف  و  الوقت  يبين  الحقيقة  فيكي  و  فية  علشان  ما تتصدموش  في بعض  بعد  الجواز  .. الجواو مش حيطير :) بس  حياتك مهمة  انك  تبقي  بتاخدي  فيها  الخطوات  اللي  انت  بجد حسباها صح

ما تتجوزيش لو  لسة  مش  لاقية  الراجل  اللي  يملا  عينك و  قلبك  وحياتك  و  تصدقي  انه  ممكن  يكون  حماية  و  أمان  و  سند  ليكي  في  الدنيا  ..لو  معاه  و  لسة  حاسة  ان  في لسة  كتير  نقصك  حتي  في وجودة  جنبك ..الايام  مش  حتجبلك  الامان  ولا  الفلوس  ممكن  تغير  كتير

ما تتجوزيش إلا  لما  تلاقي  الراجل  اللي  بكل  عيوبة  عينك  تشوفة  superman و يكون  شايفك  رغم  عيوبك  في  عينة  superwomen 

ما تتجوزيش إلا  لما  تبقي  فخورة  انك  تكوني  مراتة  .. و لما  تيجي  تقدمية  للناس  تبقي من  جواكي  طايرة  من  الفرحة  و  شايفة  انك  بتغيظي  الناس كلها  انكوا  بقيتوا ملك  بعض

ما تتجوزيش ألا  لما  يبقي  نفسك  يبقي  عندك  اطفال  شبهه  .. شكلة  في  صفاته و  ملامحة :) الامومة  اللي  جواكي  هي  الحاجة اللي اكيد مش حتكدب عليكي

ما تتجوزيش غير  لما  تشوفي  في  الراجل  دة الحد اللي  عايزاة يملا النص التاني في عيالك .. في  عقولهم  ..في  تربيتهم  .. في  تأهيلهم .. لما  يبقي  الراجل  دة  عيالك  يقلولك  شكرا ان دة بابا

ما تتجوزيش اللي تحسي انه اخد  الخطوة و عايز  يتجوزك  علشان انت كمالية  في  حياتة  زي  اللفيلا و العربية  و  عجبة شكلك  و بيقول اه  تنفع  ... اتجوزي اللي يحب روحك  .. لان  من  المؤكد ان  الشكل  حيروح ... لكن  الروح  مهما حصل  حتفضل واحدة .. كدة  تضمني  حبة  حتي بعد ما روحك  تروح  اللي  خالقها

ما تتجوزيش واحد معندوش طموح ... بكرة طموحك يدبحك و  هو  بيدفن  فيكي  كل  حلم جميل  في  الحياة .. و  مش  بس كدة  حيقتل  في  عيالك  احلامهم ... حتبقي بتشاركي في صناعة جيل  فقد الحلم ..فقد المستقبل .. فقد الحياه  و  لزتها

ما تتجوزيش اللي  بيحب فيكي  حاجات .. اتجوزي اللي لسة  ماعرفش بيحبك  ليه 

ما تتجوزيش اللي  يضيع  وسط  تفاصيل  الحياه  .. و  يفتكرك كل  فين  و  فين  :) اتجوزي اللي رغم  دوشة الحياه  بيدور عليكي  فيها 

ما تتجوزيش اللي  يغير  عليكي  بجنون  لدرجة  الشك  .. حتعيشي  عمرك  كلة تدفعي تمن عقدة انت مش طرف فيها .. و حتعيشي تبرري حاجات معملتيهاش  اصلا .. و حيبقي يسمووه "الحب الذي قتل صاحبة "

ما تتجوزيش علشان اتخنقتي و عايزة تطلعي من  بيت  أهلك  اللي فكراه سجن  ..تأكدي  لو طلعطي  بالطريقة دي من  السجن.. حتلاقي بيت جوزك  سجن  بس اكبر حبة :) تخلصي  من  السجن  اللي جواكي  الاول  ..لان سجن بيت بابا منغير مسؤلية  بس  سجن بيت جوزك بمسؤلية و  عيال و طبيخ و ترويق .. لو مش  حتعملي  كل دة و انت من  جواكي  حرة  حتبقي  بتسجني  نفسك  بأيدك

ما تتجوزيش لو كان رافض انك تكوني حبيتي قبلة ..هو  عايز  يحس  برجلته  و  سيطرتة  عليكي  و  خلاص مش  حبا فيكي ولا  شايفك جوهرة  يعني :) اسألي نفسك و  هو  أدي  لنفسة  الحق  ليه  يكون  قال  ل 1000 واحدة قبلك  انه  بيحبهم  ليه

ما تتجوزيش اللي يقولك  انت  ليا  لوحدي  و  صحابك  ما تعرفيهمش  تاني  .. لو  قبل انك  تبيعي صحاب و عشرة  سنين .. لازم  يقبل  ان حبيبتة بياعة  و ممكن  تبيعة  في ثانية  .. لازم  يبقي  عارف  انه  الوحيد  في  حتيته  انه  جوزك  و  حبيبك مش  اكتر  .. هو مش  الدنيا !! هو  جوزك ..بس 

ما تتجوزيش اللي يعوز  يغيرك  بسلطان  كلمة  بحبك ..هو  لو  عايز  يغيرك   اختارك  ليه من  الاول اصلا .. حب فيكي  اية  ؟ وهو  شايف عيوبك  و  عايز  يغيرها كمان !! لانه  لو  حبك  اصلا مش حيشوف  فيكي  عيوب

ما تتجوزيش علشان  معاه  فلوس  و  خلاص  في  مثل زمان جدودي كانوا بيقلوه

"يا واخد  القرد  علي  مالة  .. يروح  المال  و  يفضل  القرد  علي  حالة "   اتجوزية  علشان  بيحبك و بتحبية ..مهما راح  المال حيفشل الحب  موجود  يسند

يعني مش  شبكة  ولا فرح  ولا  شقة  هم  الفرح  الحقيقي ..  الفرح الحقيقي  بيبقي جوانا  و  الحاجات دي  مجرد مظاهر

ما تتجوزيش  علشان العيلة .. المناظر خداعة و ممكن  تطلع  مسرحية  حتي  ولو  بعد  20سنة الحقايق بتبان و  الحب  هو اللي بيداري و يستر مش  حاجة تانية

ما تتجوزيش علشان  هو  عاجبة  لبسك و ال style  بتاعك و  انك مهتمية  بنفسك ... اصلة  حيشوفك  و  انت  اسة  صاحية  و  انت  عيانة  و  انت  مضايقة  و انت ........ فالاساس  في  حبة  حيروح

ما تتجوزيش علشان  الفستان  الابيض  و  الكوشة  و  المزيكا  :) ولا  علشان  الزيطة  دي  بتزقك  تتجوزي  .. ولا غلشان  الصور اللي حتحطيها علي الfacebook و كلمة  engaged or  married  to  فلان  الفولاني .. ولا  علشان  شوية  ال comments  اللي  حتتحط  علي  ال profile picture  الجديدة .. كل دة  بلاستك  و  اغلب  التعليقات  مش  حقيقية ..  يا حد  غيران  و  نفسة  يبقي  مكانه  .. يا واحده  غيرانة  و نفسها تبقي مكانك 

من  الاخر  ما تتجوزيش علشان  لازم  و  مفروض  و  محتاجة  و  ضروري  ... كل  الكلمات  دي  وهم  اخترعناه  احنا  و  رسخة  جوانا  مجتمع احنا  جزء منه

 الجواز ما  هو  إلا  نظام  اجتماعي مكمل  مش  اساسي  خالص  ... يعني  ما  تتجوزيش  إلا  لما  تكوني  حتزودي  علي  حياتك  فرحة  .. الفرح  ..فرحك انت مش    أهلك  و لا صحابك ..ولا  الناس :)) الفرح  انك  تفضلي في نفس  السعادة  بعد  المزيكا  ما  تخلص  .. انك  تفضلي  بالفرحة  حتي  وسط  مشاكل  الحياه :) هو  دة  الجواز  يا عزيزتي  .. و  اي  حد  يقولك عنه  حاجة  تانيه 

لازم  تتأكدي  انه  بيخدعك 

اتجوزي ....اتجوزي ....اتجوزي ...مرتاحة .. متقبلة ..اتجوزي  لما تحبي بجد ..لما  تتمنية .. اتجوزي لما تبقي مستعدة مش محتاجة

و اتجوزي مش لما يبقي  نفسك  تسمعي كلمة بحبك..لكن لما تقدري تقوليها انت كمان