لمؤخذة ...مين اللي قال ؟؟

حدخل  في  الموضوع  علي  طول  منغير لف و  دوران  .. مواقف  في حياتنا  تستاهل  التمرد !!ورغم  ان  احنا اللي بنوافق عليها غصب عننا  ..إلا  ان ضعفنا  في  التمرد  عليها  ما  بيأذيش  حد  بيها  اكتر مننا احنا  بردة ... حكمنا علينا نكون  الجاني و  المجني  علينا  بسكوتنا   !!
حاجات اتحكم علينا   ان  احنا نورثها و  نصدقها و ننفذها و  سعات  بيتحكم  علينا  ان احنا نقنع نفسنا بيها غصب  عننا .. علشان بس في شبح كدة اسمه "عادات و  تقاليد " او  اسمه "عرف " او مالوش  اسم خالص  بس  بيبقي  الرد عليه  :
 " هما  قالولنا كدة  زمان "  
 "الناس  اصلها  بتفكر كدة "
  "اصلنا اتعودنا علي كدة "
 " المجتمع  فرض علينا كدة"
كل  الجمل  دي  اللي  بيتحط  تحتيها  كتييير من الكلام  او الاحكام  اللي مش  حبقي  ببالغ  لو  قلت  انها ممكن  بجد تدمر  حياه  بني أدم و تسرق منه  حلمة و حياته و أقلها  حتخنقه و تكتفه
الكلام  دة  من واقع حياتنا مش من برة  للاسف  ...بس مين  اللي قال و مين  اللي قرر  لمؤخذه  بس  حد  يقولي...علشان مزنوقة  في  اجابة !!
مين  اللي  قال ..ان  اولاد  الشوارع  كلهم  فاشلين ..يمكن  عندهم  حلم ما حدش  بس  سألهم علية ...ولا بأمارة ايه .. لازم  يبقوا منبوزين  من  الناس و  نقرف  حتي  نكلمهم ...برغم ان  اللي  عملهم  أولاد شوارع  هي  قسوة  مجتمع  احنا جزء منه  !!
مين  اللي  قال ..ان  الزبال ...أحم  قصدي  رجل  النظافة ..مش  نضيف و  يتقرف منه ؟؟ مع  انه  في  الاصل  بينضف  الزبالة  .. قصدي  القمامة  اللي احنا  بنرميها  !!
مين  اللي قال.. ان  اللي يتولد  مايعرفش  اب  ولا ام  يتحكم  علية  يموت و  هو  حي و  يشيل  وصمة  عار  طول  حياتة  لمجرد  انه  كان نتيجة غلطة مالوش  ذنب فيها !!
مين اللي  قال.. ان  البنت اللي  تغتصب  ..مالهاش حق  تعيش  ..و  يحق  دفنها  او  تموت  بدل  العار ما  يحل  علي عليتها مع ان هي المجني  عليها مش  الجاني !! العار  الحقيقي  ان  الناس  يسيبوا  الجاني  يرمح  بحريتة  و  يمسكوا  في  الفرخة  المدبوحة  !!
مين  اللي  قال.. ان  البنت  تسكت  لما  حد  يتحرش  بيها علشان  بس  الفضيحة  .. مع  ان  الفضيحة اللي بجد هو  السلوك  اللي  لا  يرضي  بيه  دين ولا  تربية ولا  يرضي اي  حد  ان  يلاقي  شواية  صفات  حيوانية  بتاخد  مكانها  بال"اوي " في  البشر !!
بأمارة ايه الارملة و المطلقة لازم يحكموا  علي نفسهم بالعزلة لو حبوا يربوا عيالهم علشان المجتمع بقي بجح و بيتهمهم بأي تهمة تسبهم لمجرد انها منغير راجل و كأنها مستنياه علشان يحكمها .. و كأن مافيش في  حياتها حاجات كتير بتوجها ذي المبادئ و الاخلاق و الدين .. و الكارثة الاعظم ان البشر دول بقوا فاكرين نفسهم ربنا ... ليهم  حق  يحكموا عليها و يعاقبوها علي الارض .. ما كل واحد يخليه في حالة بقي !!
مين  اللي  قال..  ان  البنت  ولا  الست  لما  ترجع  متأخر  يبقي  لازم  يتشك  فيها و  الناس  تتكلم  عليها  ..ايش  ضمنك  تكون  راجعة  شقيانة  من  شغلها  ؟ ولا  راجعة  من  درس  ؟ ولا  كانت بتحل  مصيبة لو  اتحطيط فيها  ماتستحملش !!
مين اللي  قال..  ان  البنت  عار..و ان  حقوقها  اخر  حاجة  تتبص  عليها  .. رغم  تدين  هذا  المجتمع  المظهري  ..  ان جوهر الاديان  ماحدش  عارف يمثلة بجد ...
مين اللي  قال.. البنت  ما  تعملش  حاجات  كتير  اوي  نفسها  فيها  "ابسطها  تركب  عجلة  في  الشارع  و  ماحدش  يدايقها " علشان  المجتمع  مابقاش  بيقبل  بكدة    .. و  الولد  لما  يعمل  اي  حاجة  حتي  لو كانت  غلط   بيقولوله  قشطة  فل  عليك  يا  معلم  استمر :):) مش عارفة علي اساس ايه  ؟!!
مين اللي قال ..ان البنت  و  الولد  يبقوا مش عاجبين أهاليهم  لانهم نسيوا ان  الاجيال  اتغيرت  و  فاكرين  نفسهم لسة  سنه   70 و  يجبروا ولادهم  "يحوروا عليهم " او  بمعناها  الحقيقي  يخدعوهم  و  يكدبوا  عليهم و  محدش  خلي الاولاد  يعملوا  كدة  غير  سلوك الاهالي  نفسة !!
طبعا ما بلغيش  ان  في اولاد و  بنات  بيغلطوا !!
مين  اللي  قال ..ان  البنت  و  الولد لما  يبقوا  مع  بعض  في  اي حتة  يتشك  فيهم ؟؟هي  ايه   الصداقة  بخ ؟؟
مين  اللي  قال ..ان  الولد اللي مطول  شعرة  يبقي وحش و  مش  راجل و  معندوش شخصية  بيقلد الغرب  و  عايز  يلفت  النظر .. هو  ممكن  يكون  عندة  دماغ  توزن  بلد و  احسن  مني  و  منك  100 مرة  ..هو  بس  عجبة  شكلة  كدة  ..هو حر .. من حقة يكون زي ما اختار انه يكون !! و من حقة بردة نحترمة!
مين  اللي  قال ..ان اللي  مايلبسش   "ماركات  عالمية " يبقي  بيئة  و  مش  ستايل  و  زي  مابقينا  نقول  عليه  دلوقتي  ... مش نضيف !!!
مين  اللي  قال..  ان  الشباب  اللي  قاعد  علي  القهاوي ...شباب  فاسد و  ضايع ؟؟هو  مين  اللي كان عمل الثورة و  مين  اللي كان  عايز  يغير  الظلم و  الفساد ؟؟ هم  بس مالقوش  حاجة  يعملوها في بلدهم  تانية  لو  كانوا  لقوا  ماكنوش  قالوا لا!!
مين اللي  قال..   ان  العريس  لازم  يبقي  معاه  عربية  و  شقة  و  حساب  في  البنك  و  يبقي مستواه  اعلي  علشان  البنت  تطلع  لاعلي  ما  تنزلش  لمستوي  اقل  في  العيشة  ؟ ما  زي  ما  تتشرط  .. حيتشرطوا  علي  ابنك ..مردودالك  ..مردودالك !!
مين اللي  قال.. انك  لما  تتقي  ربنا  في  الولد  اللي  حيتجوز  بنتك  تبقي  بترخصها ... ما  انت  لما  حتجوزها  لواحد  غني  و  اكبر  منها  في  السن  او  مش  بتحبة  ..  حتبقي  بتبعها  بجد  !!
مين اللي  قال.. ان  الغني  لازم  يبقي  فاسد .. و الفقير اكيد  شريف !!بأمارة ايه الناس بتحكم   علي  الشخص  من  شكلة  و وضعة  الاجتماعي  و  مظهرة و  طريقة  كلامة ؟؟
مين اللي قال ان حضرتك مضطر انك تقنعني برأيك .. و اني مضطر اقتنع ..انا و انت اصلا مختلفين و حلاوتنا في اختلافنا و لو كان من حكمة الخلق تشابهنا ماكنش ربنا عجز عن كدا ..ما نتمتع بالاختلاف دة و ندور علي التشابه اللي يجمعنا احسن ما احنا بننبش علي الاختلاف اللي يفرقنا .. و صدقني قبولك  ليا مش حينقصك  حاجة  ..
مين اللي قال .. ان  لما  حد  يقول  الحقيقية  و  يكشف  ستارة  مستخبين  وراها  .. بنتهمة  انه  بيخرج  عن  الاطار العام ... هو  الاطار  دة  مين  عملة  اصلا  ؟؟ و  تقولة " انت ايه  اللي  بتقولة  دة ؟" و " مايصحش  اللي  بيتقال "...هو  ايه  اللي  مايصحش  يا  اخ ؟؟ الحقيقة  مرة  معاكوا  و  صعبة عندك حق   .. بس  لا  يصح  إلا  الصحيح !!
مين اللي قال ان اللي يعمل كل المظاهر اللي تخليه يبان لنا متدين دة يبقي "فُلة..شمعة ..منورة "عند ربنا و يستاهل كل الاحترام .. مع ان ممكن يكون بيداري نقص فيه .. و علي رغم  كمان ان في ناس في حياتنا "أوليا .. و قدسين " بس احنا عنينا اللي بتبص علي المظهر حكمنا عليهم بأنهم  مجرمين لمجرد  ان فقرة و مظهرة حطوة في  خانة "بلطجي "
 كل  الناس  دي  ذنبهم  ايه  غير  انهم  بس  طلعوا  لقوا  نفسهم  في  مجتمع  بيصرخ  ليل  نهار  انه  بيكرة  العنصرية  و  هو  غطسان  في  عنصرية  حقيقية  تدينة  يوميا .. العنصرية  مش  سياسة  بلد  ..  العنصرية  اسلوب  حياه !!

لو  قعدت  احكي  و اعيد و أزيد  في  مواقف  و  احكام  من  الي  فرضها  علينا  المجتمع  مش  حخلص  و  حلاقي  بدل  الحكم  ..الف  حكم  حكمة علينا  المجتمع  لا  له   اساس علمي ولا ديني ولا عقلاني ولا حاجة غير  جهل و عنصرية  مجتمع متعفن  في مظهريتة ...و  فاكرين  ان  احنا كدة  نبقي بنحافظ  علي مجتمعنا  و  تراثنا  اللي بقي  مسخ  و  بيتلاشي  .. يمكن  لولا اغنية  " مع  بعض " كنا نسينا احنا تراثنا شكلة ايه ! بس  الحقيقة  ان احنا بدلنا العادات  و  الثقافة  الشرقية  اللي العالم كلة  كان  بيتحاكي  بيها  بشوية  عادات و اعراف جهلة  مالهاش  علاقة  بالانسانية  ولا بالعقلانية  لمجرد نكون  متشددين  حتي  لو  التشدد  دة  بيقهر  ناس كتير  اوي  و  بيقتل  جواهم  الرغبة  في  الحياه !
اكيد العيب  مش  فينا  ان  احنا  طلعنا  لقينا  في  قيود في  المجتمع و  أراء  غريبة  عقولنا  البشرية  سعات  بترفضها و ماتقتنعش  بيها  بس العيب  االي  بجد  ان  احنا نقول " حنعمل  اية  يعني  ما   كلها  كدة  " و نستسلم  و  نخجل  نثور  علي  اوضاع  المجتمع  اللي احنا  بنحاول  نعيش  فيه  ...من  رأي  لو  ما عرفتش  اثور ممكن  اموت  مجنونة  من  التناقض  المجتمعي اللي  عايشاه  .. اللي  في  شكلة  المتدين  و  بروح  تدينة  المفروض  يبقي  انضج من  حالتة  اللي  هو  عليها  دلوقتي ..
دعوة من  اعماقي الشخصية  للثورة علي اوضاع حياتنا المأسوية  اللي بتقتلنا و حتقتلنا و بتقتل كل  ذرة انسانية جوانا
كل كلمة قلتها مش  بالضرورة  تتفق  معايا  فيها  او  تختلفوا ... المهم  ان  كل موقف  حكموا  فيه  انسانيتكم ...و  عقولكم  .. و دينكم بس بروحة  مش  بمظهرة  !!