اسمعوا بقي و فتحولي ودانكوا كدة بعد فترة بعيد و مافيش ورقة و قلم بيقربولي كتير ...جوايا كتيير يتقال .
بس الحقيقية ان في اشياء كتيير مهمة اوي ان الواحد يتكلم فيها
اهمها ان كل حاجة في الدنيا دي ليها تمن يا سادة !
يمكن الجملة دي احنا بنسمعها كتير و انا بحكم دراستي فاهمة اوي يعني ايه للاشياء تمن بس انا مش قصدي بقي التمن اللي بالدولار و اليورو و الارقام الغريبة اللي بنسمعها الايام دي خالص ..في اتمان تانية كتييييره مهمة بردة و يمكن ماتقلش اهمية خالص عن العملات الغريبة اللي بندرسها دي
التمن اللي بتكلم عنة بقي و اللي اقصدة و حتكلم علية شوية كدة ... هو التمن اللي ماحدش بيجي في باله كتير غير لو اتعرض لموقف اتعرف عليه فيه :)
في تمن كدة الدنيا بتدفعهولنا !
اه صدقوني الدنيا .... بس انا مش قصدي الدنيا بالزمن و النصيب و الجو القديم دة لا بردة
اصل دايما بقول و نعيب ليه علي الدنيا و العيب مالينا !!
ماينفعش نقووول اصل الدنيا بقت وحشة و ماينفعش نقول اصل الدنيا بتظلمنا و الدنيا و الدنيا .. للاسف الدنيا دي يا جدعان مظلومة معانا اوي !! هي اغلب حاجة ! الدنيا دي هي اصلا ايه غير شوية بشر و اخلاق و حاجات تانية من نفس النوع دة فوق بعضها ؟؟
و لا حاجة ... ايوه الحقيقة ان الدنيا دي هي احنا و احنا هي الدنيا .. الدنيا لما بتوحش اوي علشان احنا اللي بنبقي وحشيين و الشر مالينا !!
لما الدنيا بتبقي ظالمة بنبقي احنا اللي ظلمنا بعض و قسينا علي بعض و وجعنا بعض اوي و الدنيا بتتلون بلوننا ..بتتشكل بشكلنا .. بتتعامل مع كل واحد بأسلوبة !!
انا بس حبيت اوضح ان اي حاجة بتحصلنا مش علشان الدنيا وحشة ... لأ ..علشان الناس وحشة !! الشر بقي جواهم اكتر من الخير ..مستعدين يعملوا اي حاجة و يدوسوا علي اي حاجة و علي اي حد علشان يوصلوا للهدف ... مش مهم بقي الهدف يستاهل و لا لأ ؟؟ مش مهم بقي اللي حيدوسوا عليه ده ايه او مين !!
المهم انهم يوصلوا !!
التمن بقي مين بيدفعه مش مهم .. المهم انه بيدفع ..
بس لما بفكر كدة هو التمن دة ممكن يكون تمن ايه بقي بنسبه للناس اللي بتدفع التمن ؟؟
بلاقي ان الاتمان دي ممكن تكون تبان تافهة بس هي جواها بقي بتحمل معاني كتيير اوي
في ناس بتدفع تمن وجودها وسط ناس اتحسبوا عليهم اهل ..
او ناس مثلا بتدفع تمن فرحتها ..حزن كبيير اوي تعيشة !!
في ناس بقي بتدفع تمن فرحتها حتي فلوس !
او ناس تانية بتدفع تمن راحة البال الفقر
. و ناس بتدفع تمن غناها ..مرض
و ناس بتدفع تمن ولادتها في مكان مش مكانها ...عيشة مش فهماها !!
و ناس بتدفع تمن طيبتها ...جرووح من ناس كتيير حواليها
و ناس بقي طيبتها دي بتبقي براءه مشروخة !!ناس تبقي مضايقة انها فاهمة البشر و مش عارفة ازاي ممكن تدرك الحقايق البشعة اللي اكبر من براءتها !! الناس دي براءتها بتبقي حيرانة و بيبقيوا دايما ذي اللي رقصوا علي السلم لا اللي تحت شافوهم و لا اللي فوق سمعووهم :)) مش بيبقوا عارفين يبقوا ابرية و يعيشوا بطبيعتهم و لا يكملوا طريق ادراكهم للشر !!
و دول بقي اصعب ناس بتدفع اتمان و بتبقي بتستنزف فعلا من كل الناس اللي في الدنيا !!
كل واحد فينا له تمن بيدفعة ... الناس اللي حكيت عنها دي مش غريبة عننا ..كل واحد فينا بيدفع تمن ... و الناس دي كماان مش كل اللي بيدفعوا !! لا صدقوني فيي كتير اتمان بتتدفع كل يوم و كل لحظة !!
في كتييير اتمان بتتدفع ..بس الفكرة مش في التمن اللي حتدفعة !! المهم انك تعرف انك لازم يوم ما تقرر انك تدفع تمن ..تعرف تلاقي الحاجة اللي تستاهل تدفع عليها تمن كبيير !!
شئ يكون قييم .. و انا شايفة ان اقيم ما يكون هو حياااه جديدة مع شريك للحياااه يقدرك ..لو لقيتهم ادفع اي حاجة في سبيل انك تحصل عليهم لانهم اقيم شئ يستاهل تدفع عليه ...حتي لو التمن عمرك :)
No comments:
Post a Comment