انا مش شايفة ان الناس عامة في بلدي ممكن ينهضوا !!! حتي بقي لو في مشروع نهض بحق و حقيقي !!!
لما الناس ماشية كلها في الشارع الشكمنات بتاعة عربيتها بتعمي البشر ... يبقي فين النهضة يا ابو النهضة ؟؟
لما الكورسات في الجامعة بتبدأ بعد ميعادها ب ساعة و ساعة و نص !! ممكن ننهض ازاي و الوقت مالوش قيمة في عقولنا !!!
لما النظام التعليمي ذي الزفت و الناس عايشة في مياه البطيخ !! حننهض توموتيكي يعني ؟؟
الناس فاكرة انها حتنهض لما تنتخب شخص معين من حزب معين او بيتبع جماعة معينة ... او لما يقول نعم للدستور .. ربنا حيرضي عليه .. فبلدة تنهض ..هنا بقي انا من حقي اقول لكل واحد بيفكر ان النهضة بتيجي كدة مش من حضرتك كشخص ... النهضة دي تبقي خالتك
كفاية بقي نقووول " ماجتش عليا انا يعني " لأ جت عليك يا خويا ! اعمل اللي عليك و مالكش دعوة بقي غيرك بيعمل و لا لأ .. علشان عايزة اقولك علي حاجة أكيدة مأكدة أو انا عن نفسي .. متأكدة منها جدا جدا ... أن بما ان مش متأكدة إذا كان ربنا حيسألك انت قولت للدستور آه و لا لأ بس اكيد حيقووولك انا أديتك بلد ليها حضار و تاريخ و خيرات و مميزات .. عملت للبلد دي ايه ؟؟ سرقتها ؟؟ و لا حافظت عليها ؟؟ لوثتها و لا اهتميت بيها ؟؟ حطيت مجهودك في انك تنميها و لا انك تأذيها ؟؟
دة انا متأكدة منه !! لو انت جواك حتي شك ان دة سؤال حقيقي ربنا حيسألهولك ... فكر ... مجرد التفكير في الكلام دة ممكن يغير اتجهاتك ... مجرد التفكير ممكن يغير كثير .. لأن ما أكثر الدول اللي في العالم و النظريات و الأحلام و الأنتصارت اللي حصلت في الدنيا كلها بمجرد فكرة ... او الاستمرار في التفكير في خاطرة !!
بالله عليكوا لا تفكروا بقي يا بشر !! :((
كلمات من فتاه مضايقة علي البلد دي اكتر ما مضايقة منها !!
No comments:
Post a Comment