الحقيقة في حاجة بقي مهمة جدا في مصر بتحصل ... أنا طبعا الموضوع كنت لاحظتة بس الحقيقة ان اللي قالي اكتب عليه صديقة مش أنا اللي من جوايا قررت اني اكتب عليه !
الصراحة البطالة و قلة الشغل في مصر شيء مرعب و منتشر !! القهاوي حتنفجر من كتر الناس اللي مش لاقية شغل... لدرجة ان فعلا بقي المشروع الوحيد اللي بينجح و حينجح في البلد هو انك تعمل قهوة أو كافية و تشغل فيه ال "واي فاي "
و" بلاي ستاشن "مثلا .... و الغريب ان مهما زاد عددهم بيكسبوا بردة و الناس بترووح و تملاهم !! شيء غريب ان الكم المعروض دائما مهما زاد بيفضل يستخدم و. مش بيخسروا أو يفلسوا ... آه و حاجة مهمة أوي " الشيشة " طلاما موجودة ..انت بتضمن نجااااحك الساحق في البلد و كل ما تكتر الأنواع كل ما الناس تقول لبعضها أكتر ... و كل ما النجاح فرصته تبقي أكبر !
الغريب بقي في قله الشغل دي اللي في البلد ... تفتح الجرايد تلاقي كمية الناس اللي مطلوبة للعمل أكتر من الناس اللي مش لاقية شغل !! و تلاقي ان الناس بتروح تقدم و ما بتتقبلش في أي وظيفة مهما كانت ! الموضوع دة بيصبني بهبل من التفكير معلش فكروا معايا حبه ؟؟ ازااااي عايزين دايما ناس تشتغل ... و ازااااااي بردة في نفس الوقت في ناس مش لاقية شغل !!ة لا اللي عايز يشتغل بيقبلوه و لا اللي بيدور بيقبل اللي بيتقدمله !! حقولكم بقي سبب مهم أوي للهبل دة ...' الخبرة ' آه و الله هي الكلمة المستفذة دي ... مافيش عمل عايز يعلم حد حاجة !! كل الأشغال عايزة واحد خبرة و فله و ما تعلموش و لا تديلة أي معلومة أو تفيدة هي عايزة هي تستفيد منه بكل الطاقة الممكنة
واضح ان في مشكلة بقي في موضوع التعليم عامة في البلد مش بس في الدراسة بس حتي في الأشغال
طيب الولد اللي لسة متخرج يعمل ايه ؟ ما عندوس خبرة !! طيب ما ينفعش يشتريله سنتين تلاته خبرة من السوبر ماركت و يرضي أي صاحب عمل ... طبعا ما ينفعش بس ممكن يدفع راشوة... أو يشوفله واسطة .. تشغلة
و الغريب بقي تلاقي الأشغال كلها طالبة حاجات غريبة ..... مثلا الناس تكون معاها لغات .. دة علي اساس ان الناس عندنا في البلد كلهم متخرجين من مدارس انترناشنول ..؟؟ قولولي طيب هم مش واخدين بالهم من المدارس اللي مافيهاش حمامات .. و لا المدارس اللي مافيهاش تِخَت ؟؟ او مدارس مافيهاش مدارس اصلا :) و اللي بيتخرجو من المدارس و هم بيتلغبطوا في اساميهم !! الناس دي تاكل ازاااي و تشتغل منييين ؟؟ انا طبعا مش بقوول ان الناس كلها حتشتغل في شركات كبيرة .. و لا كل الناس دي حتبقي اغنية :) بس انا مش لاقية ان في نسبة و تناسب في سوق العمل !!
الريس لما يطلع يقووولك حااان وقت العمل ... حان وقت الجهد !! تقوووله ماشي يا سيدي نتنيل نشتعل ما قلناش حاجة بس فييييين يا سيدنا . احظ أيدي بس علي الشغل و حتلاقيني فوريييرة و الله !!
و طبعا ما فيش حد بيلاقي شغل و لا حد بيعرف يشتريلة شوية خبرة ! و طبعا بيفضل الناس قاعدة علي القهوة و بيلعبوا بلاي ستاشن و بتفضل الناس قاعدة علي الفيسبوك بيدوروا علي شغل... و مايلاقوش !!و يفضلوا مكتأبين و قاعدين علي القهاوي او يمشوا في الشوارغ يغلسوا علي خلق الله !! و يفضلوا مكتأبين !! و يفضلوا بردة ضايع منهم الأمل و مش لاقين اي عداله بحكمهم !!و بردة اسمهم محكومين بالحرية و العدالة !! عجبي علي بلد شايفة الزل و الظلم علي أصوله في ظل الحكم العادل و شايفة القمع و الحبس في كل اكتأب و كل امل بيضيع منها قدام عنيها و بردة هي عايشة ومَحكومة في زمن الحرية.. انا مش بقول اي كلام و خلاص و لا بقول مثلا اي كلمتين حلوين جنب بعض علشان اجيب سيرة الحرية و العدالة و خلاص .. بس دي يقولي فين الحرية و هو مش فقادر يعمل مستقبل .. فين الحرية و هو حتي مش عارف يستقل ماديا عن اهلة دة لو أهل اشاب اصلا لاقيين ياكلو ؟؟ فين العدل لما شباااب البلد جي يبقي بيتسرق منهم جمال عمرهم و احلي سنيين حياتهم ؟؟ الكلام اللي بيتقاال محتاج الناس تفكر في شوية حتلاقس الف كلمة دراما و وجع توجع البلد دي ... و توجع الناس .. انا مش محتاجة اصلا اتكلم و اقول كلمتين يوجعوا الناس .. لو كان علي الوجع ... امشوا بس في الشارع و انتوا حتاقوا بدل السبب .. ميت الف سبب يوجعكوا و يطير النوم من عنيكوا !! عجبي عليكِ يا بلد ! !
مظبوط ... و عجبى
ReplyDelete