مش حتنازل عن حقي

مبدأيا كلامي اللي حكتبة دلوقتي عت التحرش في مصر .. علشان اللي مش عايز يكمل قراية مايكملش !!
اديني بقوول علشان ماحدش يجي يقولي انت اوفر !! انت كدة مزوداها ..انت مابتتكلميش غير عن التحرش !!!! لا انا بتكلم عن حاجات كتيير اوي غيرها !! بس واضح ان الناس اللي دماغها عامية و اللي شايف التحرش حاجة عادية هم بردة الناس اللي مش بتشوف غير اللي هي عايزة

تشوفة " اني مش بكتب غير فيي التحرش " و اللي هم هم بردة الناس اللي بتشوف البنت بالطريقة اللي قرروا يشفوها بيها ... يعني حتي لو كانت منتقبة ..هو مش ممكن يشوفها غير جسم عريان !!
انا مش حكلم علي اللي بيحصل في الشارع في العيد .. لان اصلا اللي بيحصل في العيد مش اكتر كتيير من الحاجات اللي بتقابلها في الشارع كل يوم !! فمبدأيا لو قولت تحرش العيد حبقي مش واقعية !! و حلاقي 10000 بنت تقولي يارتها جت علي ايام العيد وبس !!! التحرش مبدأيا بردة طااال كل بنت في البلد دي ! و اتحدي اي حد يجي يقولي ان في مصر بنت ما اتعرضدتش للتحرش ... و اي واحد حيقولي انا اختي او مراتي او امي حتي ما اتعرضتش للتحرش :))) حقولة انت نايم في العسل يا برنس :D :D !! اصل التحرش من لمس لكلام او حتي بصة كلها رغبة البنت رافضاها !! و مش ححكي علي اللي بيحصل لبنات علشان لو تعمقت ممكن اجبلكم اكتئاب من مجرد شوية كلام .. مش افعال !
لان مافيش في الدنيا اكبر من ألم النفس المنتهكة !! حقربها للناس شوية >> تخيلوا لو حد خد منك حاجة كنت شاريها و غالية عليك اوي و رافض ان حد ياخدها منك !! أش حال جسمكم بقي !! انا عايزة الولد انه يتخيل لو حد اتحرش بيه بيبقي مبسوط ؟؟ بيبقي عادي بيستمتع ؟؟ رد انت بقي !!
بس انا مش عايزة اتكلم في كل التفاصيل اللي اتهرت دي من كتر الكلام فيها !!
التحرش مين السبب فية و لبس البنت و حرية شخصية و التحرش برة مصر و التحرش جوة مصر و غض بصرك علشان الدين ..طيب ما تحتشم هي و تراعينا ... و انك لما تعمل كدة بتتشبه بالحيوانات :)) !! و كل الكلام اللي الناس اتهرت منه دة :)) و اللي البنات طهقوا منه فكل بنت قرررت انها تطنش الكلام دة و قررت انها تبقي ايجابية فيي الشارع و اي حد يقرب منها بتظبطة بطريقتها .. و البنات اللي لقوا الحل في self defense باي شكل بخاخة بقي معمولة في البيت بطريقة رخيصة او الكترك جايباه !! او حتي "كَتَر " يحميها !! كل بنت اختارت طريقة تدافع عن نفسها بيها :))

حتكلم عن امنية ... عايزة كل بنت تتخيل مصر بدون تحرش :) و عايز كل ولد يتخيل دة معايا بردة ة يمكن اختفاء الظاهرة دي حتبقي احسن بكتييييير لكل واحد !!
يا سلااام لو تقدر البنت تنزل من بيتها و عارفة ان مافيش حد حيتعرضلها !! و تترحم من كارثة اسمها التحفز .. التحفز من كل حد بيكلمها او حتي من اي صوت خطوات بتقرب منها .. او ظل شخص نحيتها !!
البنت حتقدر تمشي و هي عارفة ان لو حصلها حاجة في الشارع الناس حتقف جنبها مش حتبقي خايفة ان اي حد ينهش في جسمها !!
لو ركبت تاكسي مش حتبقي خايفة و مرعوبة لحد ماتوصل بيتها ..او مش حتبقي متوقعة انها ممكن تشوف حاجات مش عايزة تشوفها و تبقي حاطة ايدها علي اوكرت الباب و عندها استعداد ترمي نفسها من التاكسي في اي لحظة علشان بس تحافظ علي نفسها و ماحدش يمسها غصب عنها !! ممكن تركب ميكروباص او مشروع منغير ماتبقي خايفة حد يلمسها او يعمل فيها حاجة !!
تخيلوا ممكن نركب عجل عادي :) و ماحدش يضايقك بكلمة .. و ممكن كمان تنزلي من بيتك و تمشي في الشارع و تروحي و انت ما سمعتيش اي كلمة توصف جسمك و اجزاءة بطريقة مسفة او بذيقة !!
تخيلوا مصر منغير امراض نفسية في البنات لانها لما بتتعرض لتحرش بتكرة جسمها و بتكرهك كراجل !!! و خليك متاكد ان البنت اللي انت بتتحرش بيها حتبقي زوجة و ام و تخيل بقي الجيل المعقد نفسيا اللي حتنشئة !! كارثة مجتمعية .. انت مش بس بتضايق بنت و بتشوف انك مؤثر علي ملامح وشها و انك جامد !!
انت بتخرب المجتمع كلة !!
انا ممكن ماكنش قولت جديد في القضية !! بس انا بنت بقووول انا نفسي اعيش في بلد منغير تحرش !! نفسي امشي في الشارع مطمنة !!
نفسي اكون انسانة بتُحتَرم من المجتمع اللي عايشة فيه .. لانها ببساطة ممكن تكون احسن من اي حد ! بس مش ممكن تبدع و هي مش حاسة انها متصانة و الناس بتقدرها !!
طبعا مش حتمنعونا من ان احنا نكون ناس مؤثرة و مبدعة و قوية ! و طول عمري بقول ان كل التحديات اللي بنات مصر بتقابلها دلوقتي .. حتكلل نجاحها و حيبقوا يقولوا في بنات كانوا موجودين في الوقت دة و مااستسلموش و اصروا انهم يدافعوا عن حقوقها :)) و حيقولوا ان الناس دي كانت بتحارب و بتصرخ علشان هم يعيشوا في مستقبل !! يمكن مانكنش ناس فظيعة و لا بنطلع في التلفزيون بس لو في حياتنا قدرنا ان احنا نؤثر في واحد بس !! لو كل بنت قدرت تقول كلمة واحدة تغير بيها فكر شخص !!يبقي احنا كدة نجحنا !!
اخيرا رسالة لكل بنت ... انت صح .. انت صاحبة حق !! اوعي تتخلي عن حقك .. مش بس علشانك بس علشان بنتك .. ماتلومكيش يوم و تقولك و انت عملتي ليه يا ماما لما حقوقنا كانت بتتسلب مننا زمان !! و لا تقولك ياريتك اتكلمتي !! ياريتك دافعتي !! مافيش افظع من كلمة ياريت !!

انا حاولت اوصف الحياه بأقل بزائة علشان الناس تقدر تشوف الحقيقة البزيئة بنضافة علي قد ما اقدر !! و لو اني بشجع اي حد يبقي اكتر صراحة مني و يقدر يوصف باكثر وضوح :)) !